Posts

કચ્છ, 05 મે (હિ.સ.) ગુજરાતના કચ્છના વિરાટ રણમાં આવેલી એક અનોખી સડક આજે દેશભરના પ્રવાસપ્રેમીઓ માટે આકર્ષણનું કેન્દ્ર બની છે. “રોડ ટુ હેવન” તરીકે ઓળખાતો આ લાંબો સીધો માર્ગ માત્ર એક રસ્તો નથી, પરંતુ મુસાફરીને આધ્યાત્મિક શાંતિ સાથે જોડતો અદભુત અનુભવ બની ગયો છે. કચ્છના મુખ્ય ભૂભાગને વિશ્વવિખ્યાત ઐતિહાસિક સ્થળ ધોળાવીરા સાથે જોડતો અંદાજે 30 કિલોમીટરનો આ માર્ગ તેની અસાધારણ પ્રાકૃતિક રચના અને આસપાસ ફેલાયેલી નિર્જન સુંદરતાને કારણે સોશિયલ મીડિયા પર સતત વાયરલ થઈ રહ્યો છે.

દેશના જાણીતા ઉદ્યોગપતિ આનંદ મહિન્દ્રા દ્વારા આ માર્ગ વિશે કરાયેલ એક ભાવસભર પોસ્ટ બાદ આ સ્થળ ફરી એકવાર રાષ્ટ્રીય ચર્ચામાં આવ્યું છે. તેમણે આ માર્ગની તસ્વીરો જોઈ લખ્યું કે, “આને સ્વર્ગનો રસ્તો કહેવામાં આવે છે, અને આ અનંતक्षितિજને જોતા ખરેખર એવું જ લાગે છે. હું હજી ત્યાં ગયો નથી, છતાં અહીંની શાંતિ અનુભવી શકું છું.” તેમના આ વિચારોને હજારો લોકોએ સમર્થન આપ્યું અને અનેક પ્રવાસીઓએ પોતાના અનુભવ શેર કરીને કચ્છના આ માર્ગને “ધરતી પરનું સ્વર્ગ” ગણાવ્યું.

કચ્છના રણની વચ્ચે પસાર થતો આ માર્ગ તેની આસપાસના બદલાતા દ્રશ્યોને કારણે વધુ રહસ્યમય અને આકર્ષક લાગે છે. વર્ષના કેટલાક મહિનાઓ દરમિયાન રસ્તાની બંને બાજુ પાણી ભરાઈ જાય છે, જેના કારણે વાહન ચાલકને એવું ભાસે છે કે જાણે પાણીના અખૂટ સમુદ્રની વચ્ચેથી માર્ગ પસાર થઈ રહ્યો હોય. જ્યારે શિયાળામાં અને ઉનાળાની શરૂઆતમાં આજુબાજુ સફેદ મીઠાના પટ્ટો ફેલાઈ જતા આખું દ્રશ્ય ચાંદનીથી ઢંકાયેલા સફેદ રણ જેવું દેખાય છે. સૂર્યોદય, સૂર્યાસ્ત અને પૂર્ણિમાની રાત્રે તો આ માર્ગનું સૌંદર્ય અનેકગણું વધી જાય છે.

ધોળાવીરા તરફ જતો આ માર્ગ માત્ર પ્રાકૃતિક સૌંદર્ય માટે જ નહીં પરંતુ ઐતિહાસિક અને સાંસ્કૃતિક વારસાની સફર માટે પણ જાણીતો છે. ધોળાવીરા વિશ્વવિખ્યાત સિંધુ સંસ્કૃતિનું મહત્વપૂર્ણ પુરાતત્વ સ્થળ છે, જ્યારે ખાવડા વિસ્તાર તેની કચ્છી હસ્તકળા અને વ્હાઇટ રણની નજીક હોવાને કારણે પ્રવાસીઓમાં લોકપ્રિય છે. એટલે આ માર્ગ પર નીકળેલી સફર પ્રવાસીને એકસાથે કુદરત, ઇતિહાસ અને સંસ્કૃતિ-ત્રણેનો અહેસાસ કરાવે છે.

વર્ષ 2023 દરમિયાન યોજાયેલા G20 સમિટ સંબંધિત કાર્યક્રમોમાં પણ આ માર્ગનો ઉપયોગ થતા દેશ-વિદેશના મહેમાનોનું ધ્યાન તેની તરફ ખેંચાયું હતું. ત્યારબાદ રાજ્ય સરકારે સામાન્ય પ્રવાસીઓ માટે પણ આ માર્ગ વધુ સુલભ બનાવતા અહીં પ્રવાસીઓની અવરજવર સતત વધી રહી છે. આજે ઇન્સ્ટાગ્રામ, યુટ્યુબ અને X જેવા સોશિયલ મીડિયા પ્લેટફોર્મ પર “રોડ ટુ હેવન”ના ડ્રોન વીડિયો અને કાર ડ્રાઇવ રીલ્સ લાખો વ્યૂઝ મેળવી રહ્યા છે.

પ્રવાસીઓનું કહેવું છે કે અહીં પહોંચ્યા પછી મળતી નિરવતા અને અનંત સુધી ફેલાયેલું ક્ષિતિજ મનને અદ્દભુત શાંતિ આપે છે. શહેરના ઘોંઘાટથી દૂર આ રસ્તો જાણે માણસને પોતાના વિચારો સાથે થોડો સમય વિતાવવાની તક આપે છે. કદાચ આ જ કારણ છે કે ઘણા લોકો આ સફરને માત્ર ટુરિઝમ નહીં પરંતુ “આત્મચિંતનની યાત્રા” તરીકે વર્ણવે છે.

કચ્છની આ અનોખી સ્વર્ગસફરનો સાચો આનંદ માણવા માટે નવેમ્બરથી ફેબ્રુઆરીનો સમય સૌથી યોગ્ય માનવામાં આવે છે. આ દરમિયાન હવામાન સુમેળભર્યું રહે છે અને રણનું સૌંદર્ય પણ તેના શિખરે હોય છે. ગુજરાતના પરંપરાગત પ્રવાસન નકશાથી થોડું અલગ કંઈક જોવાની ઇચ્છા ધરાવતા પ્રવાસીઓ માટે “રોડ ટુ હેવન” હવે એક નવી ડ્રીમ ડેસ્ટિનેશન બની ગયું છે-જેમાં રસ્તો જ આખી મુસાફરીનો સૌથી સુંદર ભાગ બની જાય છે.

હિન્દુસ્થાન સમાચાર / Rohit R. Padhiyar